Paróiste an Fheirtéaraigh
Paróiste Dhún Chaoin, Paróiste Dhún Urlann,
Paróiste Mhárthain, Paróiste na Cille, Paróiste Mórdhach
Cliceáil anseo do Aifrinntí ar líne
Séipéil
Uinseann Naofa, Baile an Fheirtéaraigh (St Vincents)
Naomh Gobnait, Dún Chaoin (St Gobnait)
Séipéal na Carraige (Carraig Church)
An tAthair Eoghan Ó Cadhla 066-9156131
r-phost: baileanfheirtearaigh@dioceseofkerry.ie
Seoladh: Tigh na Sagart, Baile an Fheirtéaraigh, Trá Lí, Co. Chiarraí.
Aifrinn an Domhnaigh
Toisc nach bhfuil aon sagart i bParóiste Abhainn a’ Scáil anois beidh ar na sagairt eile sa tréadlimistéar freastal a dhéanamh ar an bparóiste sin. Féach ‘Mass Times’ do aifrinntí sa pharóiste.
Ag fanacht leis an Leanbh Íosa! Mainséar i Séipéal Naomh Uinseann.
Athair Seamus Mac Ginneá (1946-2024)
Saolaíodh an tAthair Séamus Mac Ginneá i Leataoibh Mór sa bhliain 1946. D’fhreastail sé ar Scoil na Leataithe agus ar Scoil na mBráthar sa Daingean agus ina dhiaidh san chuaigh sé ar aghaidh go dtí Má Nuad agus oirníodh é ar an 24 Meitheamh, 1973, i Séipéal Naomh Uinseann i mBaile an Fheirtéaraigh. Dhein sé staidéar an an Dlí Canónta in Ollscoil Ghreagórach na Róimhe idir 1975-1977. Chaith sé blianta i bparóistí difriúla i nDeoise Chiarraí, i mBrosnach ó 1973-1975, Leic Snámha ó 1997-1999. Chaith sé blianta fada ar fhoireann teagaisc Choláiste Bhréanainn i gCill Áirne agus ceapadh é mar uachtarán ar an gColáiste sa bhliain 1995. Sa bhliain 1999 ceapadh é ar Bhínse Réigiúnda Chorcaí Um Phósadh. D’éirigh sé as an bpost san i 2019 agus bhí sé ar scor i Leataoibh ó shin. Bhí sé thar a bheith cabhrach sa pharóiste seo agus i bparóistí éagsúla i nDeoise Chiarraí agus i nDeoise Chorcaí agus Rois. Bhí sé éirimiúil thar an gcoitiantacht agus bhí ana spéis aige i gcúrsaí staire agus seandálaíochta agus bhí sé thar a bheith fial lena chuid eolais. Bhí sé daonna, lách, cneasta, tuisceanach, cúirtéiseach, cairdiúil, cabhrach – tréithe a bhí ann go smior. Labhair sé cúpla babhta ar Raidió na Gaeltachta mar gheall a shaol agus a shaothar. Is minic a léigh sé aifrinn sna séipéil sa pharóiste agus tá teacht fós ar na cláracha sin ar suíomh Raidió na Gaeltachta. Cailleadh é ar 5 Nollaig agus cuireadh é lena thuismitheoirí Pádraig agus Bríd i Seana Reilig Chill Mhaolchéadair. Comhbhrón lena dheartháireacha Mike, Tom, nianna agus neachtanna, gaolta agus cairde. Braithimid uainn go mór é ach táimid thar a bheith buíoch gur chuireamar aithne ar an sagart séimh, uasal, léannta seo. Tá teacht ar Aifreann a Shochraide ar an nasc do YouTube atá ar rip.ie. Méadú ar a ghlóire sna flaithis.
Cártaí Nollag
Beidh Cartaí na Nollag an Pharóiste ar díol ag na hAifrinntí an deireadh seachtaine seo. Tá dhá phaca difriúil ann i mbliana. Beidh 3 íomhá ó Liam Ó Néill i bpaca amháin agus sa phaca eile beidh 3 íomhá beannaithe. 6 chárta i ngach paca ar €5. Beidh siad ar fáil in Oifig an Phoist Ceann Trá, Spar agus Siopa Uí Mhóráin sa Daingean. Cliceál anseo dos na híomhánna Cártaí na Nollag 2024
Cuireann ‘Kerry’ an capall fáile roimh thaisí Carlo Acutis, 22 Samhain. Ar chlé: An tAthair Eoghan, Gearóid Mac a’ tSíthigh, Mgr. Anthony Figueiredo le taisí Carlo Acutis agus Gwen Wiseman.
Naomh Carlo Acutis
27 Aibreán 2025
Ag Pleanáil do Thodhchaí Ár bParóiste
Le déanaí d’fhoilsigh an tEaspag Réamonn de Brún tréadlitir dár teideal ‘Ag Bogadh ar Aghaidh le Dóchas’. Cliceáil thíos don dTréadlitir iomlán.
Litir Tréadach ón Easpag Réamonn de Brún
Séipéal Naomh Uinseann
Is asatsa atá mo mhuinín agam!
Tá coinnle an Linbh Íosa ag soilsiú inár dtreo!
Séipéal Naomh Uinseann – (1871)
Tugadh faoi Shéipéal Naomh Uinseann a thógaint sa bhliain 1855, naoi mbliana tar éis an Ghorta. An tAthair Pádraig Ó Mongáin ó Chill Chonla, an Dún, Baile an Bhuineánaigh, a thug faoi dtogra seo. Seán Rua Ó Mainín ó Ghort na Lice a bhronn láthair an tséipéil. Bailíodh £220 láithreach bonn. Sholáthraigh muintir na háite na hábhair tógála, tharraingíodar ar an láthair iad agus dheineadar freastal ar na ceardaithe. Ach, cuireadh stop leis an obair i Mí Lúnasa, 1856 de cheall airgid. Shiúil an tAthair Ó Mongáin an deoise ó cheann ceann ag bailiú airgid. Críochnaíodh an tógáil ar deireadh agus cuireadh an ceann air. Ó Choill na Tóime in aice le Cill Áirne a tugadh adhmad an chinn agus slinn Chill Dálua a cuireadh mar dhíon air. Osclaíodh an séipéal i 1871. Leac chuimhneacháin do dhúthracht agus do chreideamh na ndaoine seo agus do mhisneach an tsagairt a stiúraigh iad, is ea Séipéal Naomh Uinseann.
(Céad Bliain – Séamus Mac Gearailt)
(16 Iúil, 1924 – 12 Aibreán, 2021)
Fuair an tAthair Tomás Ó hIceadha bás ar an Luan, 12 Aibreán, 2021. Bhí sé mar shagart paróiste anseo ó 1989 – 2005 agus bhí sé gníomhach sa pharóiste go dtí gur cailleadh é.
Méadú ar a ghlóir sna flaithis.
An tAthair Eoghan
Feachtas Bailithe Airgid
Tá feachtas bailithe airgid ar bun le tamall anuas chun cabhrú le cothabháil leanúnach na dtrí séipéal sa pharóiste. Nuair a thugann duine síntiús clarófar intinní i Leabhar Cuimhneacháin an Pharóiste agus beidh aifrinntí speisialta i rith na bliana dos na h-intinní sin. Cliceáil anseo chun an fhoirm a íoslódáil anuas.
Buíochas ó chroí do gach uile duine a thug síntiúis don bhFeachtas Bailithe Airgid go dtí seo. Go gcuití Dia go fial libh!
| An tAthair Eoghan Ó Cadhla |
| Tigh na Sagart |
| Baile an Fheirtéaraigh, Trá Lí |
| Guthán:- 066 9156131 |
| e-mail: baileanfheirtearaigh@dioceseofkerry.ie |
Fógraí na Seachtaine, 2024 12 22
Ár n-achainíocha ag Carlo thall in Assisi!
An tAthair Chris O'Donnell ag ceiliúradh Aifreann Carlo Acutis, ar an Aoine, 22 Samhain.
Séipéal Naomh Uinseann - ullamh do Carlo Acutis
Scrín don gCroí Rónaofa i Séipéal Naomh Gobnait
Scrín Carlo Acutis i Séipéal Naomh Gobnait
Saoire tré Ghaeilge i mBrú na Gráige Cliceáil anseo:- Brú na Gráige
Carlo Acutis 1991-2006 (Féile 12 Deireadh Fómhair)
Saolaíodh Carlo Acutis i Londain, agus nuair a bhí sé óg d’aistrigh an clann go dtí an Iodáil. Bhí grá ar leith aige don Eocairist agus don gCoróin Mhuire agus chuir sé iachall ar a thuismitheoirí é a thabhairt go dtí na scrínte cáiliúla san Iodáil agus áiteanna eile. Bhí ana chur amach aige ar chúrsaí ríomhaireachta agus chuir sé suíomh idirlíon le chéile mar gheall ar na míorúiltí eocairiste agus tá an suíomh sin fós ar an idirlíon. Buaileadh breoite le hailse é nuair a bhí sé ina dhéagóir agus d’ofráil sé a fhulaingt ar son an phápa agus na heaglaise. Tá sé curtha in Assisi agus téann na sluaite go dtí a uaigh. Tá cáil air ar fud an domhain faoin dtráth seo. Ainmneofar é mar naomh an bhliain seo chugainn.
Inis Cathaigh
D'eagraigh Cumann na Sagart Chiarraí oilithreacht go Inis Cathaigh le déanaí. Léadh Aifreann in ónóir do Naomh Seanán ar an oileán.
Dóchas Linn Naomh Pádraig
Dóchas linn Naomh Pádraig,
Aspal mór na hÉireann,
Ainm oirearc gléigeal, solas mór an tsaoil é.
D’fhill le soiscéal grá dúinn ainneoin blianta i ‘ngéibheann.
Grá mór Mhac na Páirte d’fhuascail cách ón daorbhroid.
Sléibhte, gleannta, mánna ‘s bailte mór’ na hÉireann
Ghlan sé iad go deo dúinn, míle glóir dár naomh dhil.
Iarraimíd ort, a Phádraig, guí orainn na Gaela,
Dia linn lá ‘gus oíche ‘s Pádraig Aspal Éireann.
Paidir do Naomh Gobnait
Beannaím dhuit a Ghobnait Naofa,
Mar a bheannaíonn na naoimh,
Beannaím féin dhuit,
Is chughatsa a thána ag gearán mo scéala
Is a d'iarraidh leighis i gcúntais Dé ort.
Paidir an Phápa
Paidir a scríobh an Pápa Benedict XVI
do Sheanaithreacha is do Sheanamháithreacha
A Thiarna Íosa, a saolaíodh den Maighdean Mhuire,
iníon le Naomh Joachim is le Naomh Anna, féach le barra grá
ar na sean-aithreacha is ar na seana-mháithreacha
ar fuaid an domhain.
Tabhair cosaint dóibh!
Is tobar saibhris iad:
dá gclann, is do chlann a gclainne, is don Eaglais, is don saol ar fad.
Tabhair taca dhóibh!
Do réir mar a raghaidh siad in aois,
gura fada buan i measc a gcoda féin iad:
galláin láidre chreideamh an tSoiscéil,
lucht cosanta na gcuspóirí is uaisle do shaol an teaghlaigh,
stóras saibhir beo de thraidisiún folláin an reiligiúin.
Dein díobh múinteoirí an mhisnigh is na heagna,
chun go gcuirfidís ar aghaidh do na glúinte atá ag teacht
torthaí a dtaithí fada féin sa daonnacht is sa spioradáltacht.
A Thiarna Íosa,
cabhraigh leis na teaghlaigh,
agus leis an saol go léir ina maireann siad,
meas agus luach a chothú
ar láithreachas agus ar ról mhuintir chríonna na leanaí.
Ná déanfaí go deo neamhaird dóibh,
ná ná fágfaí ar an imeall iad,
ach gurab é an grá is an meas a bheadh i gcónaí orthu.
Cabhraigh leo maireachtaint go sítheach síochánta,
agus gurb í an fháilte a bhraithfidh siad i gcónaí rompu,
ar feadh na mblianta go léir a dheonóidh tú ar an saol so dóibh.
A Mhuire, a Mháthair na mBeo go léir,
coinnibh na seanaithreacha is na seanamháithreacha i gcónaí fé do Bhrat;
fan lena gcos is iad ar oilithreacht an tsaoil seo;
agus de bharr do phaidreacha,
deonaigh go dtabharfaí teaghlaigh an tsaoil seo go léir le chéile arís,
inár dtír cheart dúchais ar neamh,
mar a bhfuil tú féin ag fanacht leis an gcine dhaonna ar fad,
chun breith isteach orthu i mbarróg an bheatha shíoraí.
Amen!
Naomh Antaine - Séipéal Naomh Uinseann
Beannacht do Chros Bhríde
A Thiarna Dia, bhain Naomh Bríd feidhm as an gcros
Chun an creideamh a chraobhscaoileadh agus chun easláin a leigheas,
Cuir do bheannacht ar na crosa seo le go mbainfí feidhm astu
Chun breis tuisceana a fháil ar rúndiamhra ár gcreidimh, agus chun
Ár n-easláin a leigheas agus sinn a chosaint ó gach galar agus aicíd.
Sin é ár nguí chugat trí Chríost ár dTiarna.
An tAthair Tomás ar 'Twitter' - Taifead a deineadh le linn na paindéime. Beannacht Dé leis.
http://twitter.com/MOLSCEAL/status/1253224950888124416
Comaoineach Spioradálta
Nuair nach féidir leat Comaoineach a ghlacadh, is féidir leat an phaidir seo a rá:
A Íosa, creidim go daingean go bhfuil tú i láthair sa Naomhshacraimint. Tá grá agam duit ós cionn gach uile ní agus is mian liom tú a ghlacadh isteach im’ anam. Ó tharla nach féidir liom tú do ghlacadh anois sa Naomhshacraimint, tar ar a laghad go spioradálta isteach im’ chroí. Tar chugam mar sin, a Thiarna, agus méadaigh do ghrásta ionam. Ná lig dom scarúint leat go brách. Moladh go deo leat, a Íosa sa Naomhshacraimint.
(Lámhleabhar Chuallacht An Chroí Ró-Naofa)
Paidreacha
Cliceáil anseo do Liodán na Maighdine Muire
Cliceáil anseo do phaidreacha coitianta: Paidreacha Coitianta
| SÉIPÉAL | LUAN - AOINE
|
SATHARN | DOMHNACH | |
|---|---|---|---|---|
| Uinsann Naofa, Baile an Fheirtéaraigh (St Vincent's) |
Luan 9.30rn, Déardaoin |
10.00 rn Nóta: Beidh Aifreann á chraoladh beo ó Shéipéal Naomh Uinseann, Dé Domhnaigh 5 Eanáir ar a 11.00rn. Ní bheidh Aifreann ar a 10.00rn an lá seo.
|
||
| Naomh Gobnait, Dún Chaoin (St Gobnait's) |
*** | 9.00 rn (gach re seachtain, féach thíos don róta) |
||
| Séipéal na Carraige
(Carraig Church) |
Dé Máirt ag 9.30rn Dé hAoine ar a 7.00in |
7.30 in
(gach re seachtain, féach thíos don róta) |
Féach Fógraí na Seachtaine do Aifrinntí breise.
Cliceáil anseo do Aifrinntí 2024
Beo ar an Idirlíon ó Shéipéal Naomh Uinseann https://www.mcn.live/Camera/st-vincents
Aifrinntí na Nollag 2024
Oíche Nollag, Dé Máirt, 24 Nollaig
Séipéal Naomh Gobnait 5.00in
Séipéal na Carraige 7.00in
Séipéal Naomh Uinseann 8.30in
Lá Nollag, Dé Céadaoin, 25 Nollaig
Séipéal Naomh Uinseann 10.00rn
Séipéal na Carraige 11.15rn
Cliceáil anseo do Aifrinntí 2025
Aifreann i Reilig Dhún Chaoin 2024
Adhradh na Naomh Shacraiminte
Séipéal na Carraige, gach Luan idir 3.00 - 6.00 i.n.
Séipéal Naomh Uinseann
Beidh Adhradh tar éis Aifrinn i Séipéal Naomh Uinseann, ar an Luan agus ar an nDéardaoin. Tosnóidh an tAdhradh ag 10.00rn agus ag leanúint ar aghaidh go dtí 10.30rn. Is féidir logha a fháil nuair a chaitheann duine leathuair a chloig ós comhair na Naomh Shacraiminte.
Fáilte roimis gach éinne.
Domhnach na Trócaire Diaga
Cliceáil anseo don: Nóibhéine agus Mionphaidrín.
Cliceáil anseo do: Searmanas do Dhomhnach na Trócaire Diaga
Árdaím mo shúile go dtí na cnoic:
cad as a thiocfaidh cúnamh chugham?
Is ón dTiarna féin a thiocfaidh mo chúnamh,
an té a dhein neamh agus talamh. (Salm 120)